24e Tro Menez Are : prest oc'h da vale ?

Emgav ar bloaz evit ar vrezhonegerien a blij dezho kerzhout, setu un digarez da vont war hentoù Menezioù Are, gant plijadur ha dindan un amzer, vrav e-touez miliadoù a dud mennet ha kalonek.

300 den a youl-vat, 7.500 baleer gortozet : penaos e reont evit kaout kement a startijenn pep bloaz ? "Lin er parkeier, er bourk e son ar c'hleier, glad ar vro bepred a chomo", setu ar pezh a vez kinniget gant skipailh kerent skol Diwan Kommanna ha tud Menezioù Are.

Gant ouzhpenn 70 bugel e 4 c'hlas eo skol Diwan Kommanna unan eus ar skolioù brasañ er Menezioù Are. Aozet e vez div abadenn c'hoariva pep bloaz gant ar skol, gant ADDES, Strollad ar Vro Bagan ha strollad Mat ar Jeu.

7 tro disheñvel a vo kinniget (6, 10, 15, 20 ha 30 km), etre 7e30 ha 4e30 gk. Ha gant priz ar bilhed (8 euro war al lec'h, 7 euro mod-all) e vo roet ur gartenn deoc'h, ur frouezhenn, un tiked evit evañ, ha pa vo echu an dro-vale, ur prof ha gwir da vont d'ar fest-noz digoust !