Goude diskourioù brav an Itron Blondin, ul lizher souezhus...
Diskourioù brav zo bet gant ar senatourez Blondin (https://www.abp.bzh/fetch.php?id=24959&searchkey=blondin=), erlec'hierez Andre ar Gall, anat deoc'h, met n'eo ket bet ken brav al lizher sinet ganti resevet hiziv gant kevredigezhioù Penn ar Bed a ra war dro an embann e brezhoneg.
Nullet e vo da vat ar yalc'had evit "an embannerien ne reont ket ul labour evit ar yaouankiz nemetken, ha betek 10 vloaz". Penaos vo graet neuze gant tout ar raktresoù a zo war ar stern, ar skridoù a zo bet kaset, an dud a zo implijet evit maketenniñ, mont e darempred gant al lennerien hag ar skolioù, skolajoù ... ? Hag evit ar re deuet ? Netra da lenn e brezhoneg ? E peseurt bed emaomp ? En un tu e vez lavaret eo a-bouez ar brezhoneg hag en un tu all e vez tennet tout an arc'hant. Diboell ha direizh.
'Benn ar fin etre "emgann" hag "embann", n'eus ket kalz a ziforc'h, ul lizherenn hepken evit adtapout ul lennegezh en arvar.
Commentaires (5)
Daoust ha lezet e vo dilennidi PS 29 da baboriñ e manifestadeg Kemper e fin ar miz ? Daoust ha plijout d'an dud-se eo ar pal ?
N'on ket souezhet.
Pa oa deuet ar PSF e penn ar Rannvro em boa resevet ul lizher a-berzh o servijoù a lavare din ne vefe mui roet a yalc'hadoù evit hon embannadurioù peogwir e vezent "moulet fall". Ouzhpenn-se e nac'hent ivez reiñ ur yalc'had dre ma oa relijion danvez an oberenn. Den ebet ne glemmas d'ar poent hont.
Savedigezh aozadur Centre du Libre en Bretagne e Kemper d'ar mareoù-se a zo ivez a-berzh a sosialisted, a-benn reoliañ an embann e brezhoneg.
Ganto n'eus ket a frankiz-embann da gaout : gant ar skorennoù emañ an holl embannerien vras en o dalc'h !
Dija en amzer Loiz XIV hag a-raok e oa kont evel-se : hennezh a veze anvet "le maître des lettres et de l'art' dre ma oa eñ gant arc'hant e dailhoù, a roe labour d'ar arzourien ha lenneien.
Ar wir gudenn a ranker obet meneg anezhi eo houmañ : emaomp e dalc'h ur stadelouriezh gwirion. Pouez kellidsteuñv/budget ar stad a vir ouzh hor c'humuniezh politikel da ziorren hor stuzegezh deomp-ni, da grouiñ ur stuzegezh a vefe e tailh da reiñ lamm d'ar Stad-se. Evel-se, war-eeun dre an deskadurezh a-berzh-stad, dre al lezennoù, dre ur velestradurezh en he servij, met ivez dre zoareoù all (deskadurezh lezanvet 'prevez' gwechall katolik pe Diwan zoken - gwelet mat e oa bet gant afer skolaj Roparz Hemon a oa bet divadezet war c'houlenn an departamant just-a-walc'h, dre ar skorennoù da nouspet kevredigezh, dre ar meziennoù/médias, ha dre ar skorennoù d'an embann ha me oar-me.
E berr gomzoù, pezh a fell din lavarout eo ez eus ur priz d'ar frankiz. Ret eo bezañ bepred prest da zioueriñ ar skorennoù ma fell deomp chom dieub.
Evit an embann brezhoneg ez eus ur gudenn vras :war strishaat ez a ar marc'had (gant internet an dud ne lennont ket kement ; n'hon eus ket abaoe pell a skrivagnerien a zoare a seurt gant R. Hemon, Langleiz, R. ar Mason, Berthou... ) ha pa glemmit dwb an oberennoù o defe ezhomm an dud vras me respont deoc'h ez eus leun a levrioù bet embannet hag a chom da louediñ dre ma ne gaver ket prenerien.
Da skouer ar Romant hirañ bet moulet e brezhoneg, unan abled gant gwir gudennoù hon Emsav (kudenn ster ar stourm evit ur yezh marv e-touez an dud e Breizh, kudenn ster ar gevredigezh arnevez a vremañ diouganet e 1935 gant Huxley, Enez ar Vertuz, ur romant prederouriezhel a skiant faltazi, heulian "Brave New World" Huxley, ar romant lennetañ er bed hemeñ, pet skouerenn gwerzhet ? War-dro 150. 10.000 euro postet !
Ha neuze "An Nor d'ar vuhez deol" sant Fransez a Sal, ur bennoberenn a speredelezh, hollanavezet, talvoudus bras a fed live ar yezh a ranker da dizhout evit kaout un droidigezh propik e brezhoneg, pet skouerenn gwerzhet evit an oberenn-se a 342 pajennad ? Hini ebet. Chomet an holl levrioù er stal.
Ha troidigezh an Tadoù eus an Iliz he deus koustet evit al levrenn gentañ (1200 pajennad war baper bibl) war ar peder levrenn ? Koust : 20.000 euro. Pet skouerenn gwerzhet ? 50 marteze.
Ne ra forzh : ned eo nemet arc'hant ; koustoù ar moulañ a zigresk ; dizale e vo aes reiñ da lenn levrioù dre e-books (taolennigoù niverel). Nann, pezh a zo nec'hus eo n'eus ket a wir skrivagnerien (me fell din lavarout tud o deus un dra bennak da lvarout e gwirionez), hag ez eus dreist-holl war an dachenn gladoù-kenverzh, stalioù, ha n'eo ket mui stourmerien. Ar gwellañ skouerioù eo pezh ez eo deuet da vezañ KUZUL AR BREZHONEG hag EMGLEO BREIZ. Truezus !
T. Gwilhmod, Kadoriad Emglev An Tiegezhioù, kevredigezh-merañ embannadurioù Imbourc'h, Keneiled Imbourc'h ha Kristenion Breizh
Komz a rit eus an embann, ar memes tra eo evit ar c'hoariva : digresket e vo ar skoaziadoù ivez. Hag evit an tañva er skolioù : petra a vefe c'hoarvezet ma ne vefe ket bet roet gant ar Rannvro an arc'hant bet tennet gant departamant 29 ? Poent eo deomp fiñval e 29, ne c'hall ker kenderc'hel evel-se. Ur pezh kudenn a zo gant an departamantoù. Ur spont eo gant kuzulioù-departamant 22 ha 35. En ur mod n'eus nemet gant hini 56 e ya war-raok er mare-mañ. N'on ket eus an tu kleiz met ret eo stadañ e vez meret departamantoù 29, 22 ha 35 gant ar PS. N'eo ket dav gortoz ul lezenn pe sinañ ur garta evit mont war-raok ha n'eo ket un afer arc'hant nemetken. Un afer a youl eo dreist-holl. Sevel a ran a-du gant Eozen : ha laosket e vo ar PS da zibuniñ e straedoù Kemper ? Petra a ray Kevre Breizh ?!
«an embannerien ne reont ket ul labour evit ar yaouankiz nemetken, ha betek 10 vloaz»\".
A-dra-sur eo bet troet ar frazenn-mañ diwar ar galleg. Ne vefe ket posubl deoc\'h lakaat anezhi en-dro er yezh-se evit ma vefe sklaeroc\'h? C\'hoant em bije kompren petra dalv, digomprenus eo.
War a seblant ne vo ket arc\'hantet an embannerien a embann levrioù evit ar re goshoc\'h eget 10 vloaz (ar c\'hentan derez).