Tro dro Mellag : kanerien ha prezegennerien en iliz ar vourc'h

Degemeret ar valeerien gant Fañch hag Anne Postic, Anne-Marie Colomer, Alan Peron, Yann-Ber Derredel ha Fulub Guern...

Barradoù glav da vintin, gleb ar geot evit mont da vale. Ne vern,heuliañ a ra ur vandennad 27 den an heñter Jean-Yves Toullec evit dizoleiñ trowardroioù an Isol, embregerezhioù, ar Vilin Wenn, musisianed war an hent hag ur bern traoù souezhus all.

En iliz, sioul hag aketus an dud : abadennig telenn gant Anne Postic, tonioù ar vro ha tonioù bro Skos, bro Iwerzhon. Ha pep arvester da veajiñ war kordennoù an avel o c'hwezhañ dre vizied an delennourez ampart. Da c'houde e vo he zad, Fañch, o tisplegañ piv oa an abad Henry, un den sot gant ar brezhoneg, levezonet kalz gant ar Gonidec, ha brezhonegerien bro Leon. Solfadurezh troet e brezhoneg gantañ, buhez Sant Isidore, ur bern testennoù sakr ...

Ne baoueze ket Fañch da reiñ munudoù buhez ar beleg. Meneget en doa e oa an abad Henry enoret e Mellag pa oa bet e bloavezhioù 1930 gouel ar Bleun Brug, d'ar mare-se e oa un aotrou Henry, deuet da vezañ maer ar gumun, ha komunour da vat. Tremen a ra an amzer, paotred ...